सत्यवतीका ५६ बर्षिय भिम बहादुरसँग तरकारी खेतीका कुरा

कृषि

Home
कृषि
सत्यवतीका ५६ बर्षिय भिम बहादुरसँग तरकारी खेतीका कुरा

सत्यवतीका ५६ बर्षिय भिम बहादुरसँग तरकारी खेतीका कुरा

सोमवार, भदौ १४, २०७८ कञ्चन खवर

#जगिलाल थापा

भिम बहादुर फौंजा गुल्मी जिल्ला सत्यवती गाँउपालिका वडा नं. ३ ठूलो लुम्पेकका हुन। उनले आफ्नो उर्वर जवानी उमेर भारतको मुम्बैमा बिताए । २२ बर्ष सम्मको मुम्बै बसाई पछि आफ्नै जन्मभुमी ठूलो लुम्पेकमा फर्किए अनि सामाजिक क्षेत्रमा हातेमालो गर्दै आए ।
उनलाई तेश्रो पुस्ताका युवाहरुले अभिभावकको रुपमा सम्झिएर स्थानिय आदर्श समाज ब्यवस्थापन समूहको अध्यक्ष त्यसपछि सल्लाहकार बनाए । उनि उक्त समूहको नेतृत्वमा नभएपनि उनकै सल्लाह र सुझाव अनुसार आदर्श समाज निर्माण गर्नमा त्यो समाजको तेश्रो पुस्ता तल्लिन छन। गाँउमा लामो समयसम्म उत्पादनबिहिन बसाई पछि उनले ब्यवसायिक रुपमा तरकारी खेती गर्न तिर लागे । यसै क्रममा २० बर्षपछि नयाँ संरचना सहितको स्थानिय सरकारको रुपमा स्थानिय तह ब्युतिएपछि गाँउमै केही गर्नुपर्छ भन्ने सोंच लिएका युवाहरुलाई राहत मिल्न थालेको उनले बताए।

भिम बहादुर फौजा गाँउमा रहने युवाहरुलाई ब्यवसायिक कृषि तर्फ लाग्ने प्रेरणा लिने मध्येका एक हुन। गाँउमा ४/५ बर्ष अगाडी देखि ब्यवसायिक तरकारी खेती गर्ने चलन शुरु भएको भएपनि युवाहरुले उति चासो दिएका थिएनन। गाँउमा ब्यवसायिक तरकारी खेतीको शुरुवात गर्ने सत्यवती गाँउपालिका वडा नं.३ साविक ठूलो लुम्पेक टेकका बोमबहादुर थापा हुन। उनकै सिको गदै अहिले ठूलो लुम्पेकका प्राय युवाहरुले टनेल खेती गर्न थालेका छन। यसैको शिलशिला हुन टनेल खेती गर्न थालेका ठूलो लुम्पेक भञ्ज्याङ्गका भिम बहादुर फौजा।

बिगत ३ बर्षदेखि टनेल भित्र तरकारी खेती गर्दै आएका भिम बहादुरले एउटा टनेलबाट २५ देखि ३० हजार रुपैँयासम्म आम्दानी गर्दै आएका छन। ४०/१० हातको लम्बईको ३ वटा टनेलका मालिक भिम बहादुरले यतिबेला बेमौसमी टमाटरको खेती गर्नमा ब्यस्त छन । एक भरकन बन्दा गोभी उत्पादन गरी बेचेर सकेका छन। बमौसमी बन्दा गोभी लगाउदा राम्रै कमाए छन। उनले बजारको अभाव झेल्नु परेन। टनेल भित्र अहिले लगाइएको टमाटरको एउटा बोटबाट कम्तीमा ३ किलो देखि १० किलो सम्म उत्पदान हुने र त्यसबाट अहिलेको बजार भाउ अनुसार २ सय देखि ७ सय रुपैया सम्म कमाइ हुने उनको भनाइ छ।

यदि टनेल बनाएको बारीमा मकै छरेको भए जम्मा एक डोको मकै उत्पादन हुने र त्यसले पुग नपुग दुई दिनलाई खान पुग्ने उनले बताए । तर टनेलबाट एक सिजनमा ३० देखि ४० हजार रुपैँयासम्म आम्दानी हुने भएपछि भिम बहादुरले सबै बारीमा टनेल खेती गर्ने योजना बनाएका रहेछन। उनले एउटा टनेलमा २ सय वटा टमाटरको बिरुवा लगाएका छन । उमेरका हिसाबले ५६ बर्ष पुगिसकेका भिम बहादुरले यहि तिज सम्म टमाटर उत्पादन हुने बताए। जब मनमा केही गर्ने उत्साहले भरिएर आउछ तब उमेरले कुनै हदबन्दी लगाउन सक्दैन भन्ने सोंच भएका भिम बहादुरको तनमा उत्तिकै उर्जा छ। यदि यस्तो अवसर पहिल्यै मिलेको भए आफु लगायत अन्य युवाहरु बिदेशमा गुलामी गर्न जानु पर्ने परिस्थिती आउने थिएन भन्दै उनले बारीको जस्तो बनावट छ त्यस्तै टनेल बनाईदिन स्थानिय सरकारलाई उनले उनले अनुरोध गरेका छन । साविक ठूलो लुम्पेकलाई तरकारी ब्लकको रुपमा बिकास गरिएको र सोही अनुसार स्थानिय सरकारले टनेल बनाउन सहयोग गर्दै आएको उनले बताए ।

स्थानिय रुपमा उत्पादन भएको उत्पादनहरुलाई बजारसम्म पुर्याउन स्थानिय संस्था आदर्श समाजले गाडी किनेर कृषि गाडीको रुपमा सुविधा दिदै आएको कृषक भिम बहादुरले बताए । जसले गर्दा आफुहरुले उत्पादन गरेको कुनै पनि उत्पादनको बजारको अभाव नहुने उनको भनाई छ। खेती गर्न गर्न सके राम्रो उत्पादन गर्न सकिने बताउदै टनेल खेतीमा लाग्ने बिभिन्न रोगहरुको रोकथामका लागि उनले गाई भैसीको पिसाबमा बनमारा झार र तितेपाती मिसाएर बिषादी बनाई प्रयोग गर्दै आएका छन।
टनेल खेती गर्न उनकी श्रीमतीले पनि सघाउदै आएकी छिन । उनका ३ भाई छोराहरु पनि आ आफ्नो पेशा गर्दै आएका छन। जेठो छोराले ब्यवसायिक बाख्रा पालन गर्दै आएका छन भने बाकी दुई छोराले सिकर्मीको काम गरेर आत्म निर्भर बन्दै आएका छन। ठूलो लुम्पेकको हरेक सुर्का बारीहरुमा मकै खेती भन्दा तरकारी खेती गर्न सके आत्म निर्भर भइने उनको अनुभव छ । बिषादी रहित तरकारी खेतीबाट प्राप्त अम्दानीले आफ्नो परिवारलाई सजिलै पाल्दै आएका भिम बहादुरले अबका दिन टनेल खेतीलाई अझ ब्यवस्थित बनाउदै जाने योजना समेत बनाएका छन।

प्रकाशित मिति: सोमवार, भदौ १४, २०७८, ०६:२२:००